Björgvin G. Sigurðsson (andsvar):
Virðulegi forseti. Hún hefur nefnilega ekkert breyst. Eins og kom fram í máli formanns Samf., hv. þm. Össurar Skarphéðinssonar, og framsóknarmaðurinn hv. þm. Páll Magnússon vitnaði til, þá eiga fjölmiðlarnir einmitt að heyra undir sömu lögmál, sömu samkeppnislög og önnur fyrirtæki í landinu. Nákvæmlega þetta sögðu bæði Björn Bjarnason og Össur Skarphéðinsson í þinginu á þessum tíma og Björn löngu fyrr. Hv. þm. Páll Magnússon rammaði þetta prýðilega inn þar sem hann dró það sérstaklega saman í einni snjallri tilvitnun í Össur Skarphéðinsson að fjölmiðlar og önnur fyrirtæki lytu sömu lögum, það ætti ekki að taka fjölmiðlana út úr og ganga á milli bols og höfuðs þeim ef ráðamönnum byði svo við að horfa, heldur ættu fjölmiðlar að lúta nákvæmlega sömu lögmálum og önnur fyrirtæki í landinu. Ég ætla að biðja hv. þm. Pál Magnússon að fara aftur með þessa tilvitnun ef hann er ekki með aðra, en þeir hafa verið með þær nokkuð margar, framsóknarmennirnir, í dag þannig að hann er kannski með einhverja nýja.