![](http://www.althingi.is/myndir/althlit.gif)
Birgir Ármannsson (andsvar):
Hæstv. forseti. Hv. 7. þm. Suðurk. og reyndar fleiri hv. þingmenn Samf. hafa vitnað nokkuð til ákveðinna grundvallargilda í stjórnarskránni, eignarréttar, atvinnufrelsis og tjáningarfrelsis. Af máli þeirra má skilja að það frv. sem hér liggur fyrir feli í sér mikið brot á þessum réttindum. Þess vegna vil ég spyrja hv. þm. hvort hann telji að þessi réttindi séu brotin, með svo freklegum hætti sem hann lýsir, í löndum eins og Bretlandi, Frakklandi, Þýskalandi og Bandaríkjunum. Er honum kunnugt um að umræðan í þeim löndum, um reglur á þessum sviðum, snúist um þessa þætti? Telja menn að löggjöfin í þessum löndum standist ekki grundvallarmannréttindi, grundvallaratriði borgaralegs frelsis? Eins og fram hefur komið í þessum umræðum fara öll þessi lönd, hvert með sínum hætti, inn á þetta svið, að setja reglur sem setja eignarhaldi skýrar og ákveðnar skorður að ýmsu leyti.