[prenta uppsett í dálka] 108. fundur, 130. lþ.
Birgir Ármannsson (andsvar):
Hæstv. forseti. Það vakti athygli mína að í svari hv. 7. þm. Suðurk. við andsvari mínu kom ekki svar við þeirri spurningu sem ég lagði fram. Ég spurði hvort hann kannaðist við að í Bretlandi, Frakklandi, Þýskalandi, Bandaríkjunum og fleiri löndum þar sem strangar reglur gilda um eignarhald á fjölmiðlum, væri allt logandi í óánægju, óeirðum og ég veit ekki hvað og hvað vegna þess að þar væri gengið gegn grundvallargildum borgaralegra réttinda. Það má skilja það á máli hans að svo sé gert í þessu máli. Ég velti fyrir mér: Hvers vegna er slík umræða ekki uppi í þessum þroskuðu lýðræðisríkjum sem hann nefnir?
Ég vil bæta því við, af því að hann vitnaði í ákveðna lögfræðinga og hv. þm. Kristinn H. Gunnarsson, að það er afar oft tekist á um þessa þætti þegar frumvörp eru lögð fram á þingi. Það er ekkert nýmæli að þessir tilteknu ágætu lögfræðingar hafi aðrar skoðanir en fjöldamargir aðrir lögfræðingar hafa á ýmsum málum eins og fram hefur komið opinberlega á undanförnum dögum.
