2004-05-04 01:24:57# 130. lþ. 108.2 fundur 974. mál: #A útvarpslög og samkeppnislög# (eignarhald á fjölmiðlum) frv. 48/2004, ÖS (andsvar)
[prenta uppsett í dálka] 108. fundur, 130. lþ.

[25:24]

Össur Skarphéðinsson (andsvar):

Herra forseti. Ég hef sagt að samkeppnislög eigi að ná yfir fjölmiðlafyrirtæki alveg eins og fyrirtæki á matvælamarkaði.

Mig langar, vegna þess að hv. þm. telur að ekki séu heimildir í samkeppnislögunum til að fara þessa leið, að vísa í ákvörðun samkeppnisráðs nr. 21/1998, þar sem fjallað var um breiðband Landssímans. Þar kemur fram að samkeppnisráð lítur svo á að það hafi tiltölulega frjálsar hendur við val á þeim aðgerðum sem talin er þörf á að grípa til í hverju tilviki. Það kemst þar að þeirri niðurstöðu að ef markmiðum samkeppnislaga verði ekki náð með öðru og vægara móti en því, t.d. í þessu tilviki að Landssíma Íslands verði skipt upp, sé ótvírætt heimilt að grípa til slíkra aðgerða. Ef það er heimilt með Landssíma Íslands, hvers vegna þá ekki með fjölmiðlafyrirtæki ef um er að ræða ítrekuð brot?