2004-05-04 01:54:07# 130. lþ. 108.2 fundur 974. mál: #A útvarpslög og samkeppnislög# (eignarhald á fjölmiðlum) frv. 48/2004, HHj (andsvar)
[prenta uppsett í dálka] 108. fundur, 130. lþ.

[25:54]

Helgi Hjörvar (andsvar):

Virðulegur forseti. Það er rétt hjá hv. 6. varaforseta Alþingis Birgi Ármannssyni að ég taldi það ekki vera sérstakt áhyggjuefni, nei, en ég benti jafnframt á að við hefðum flutt tillögur á Alþingi um það hvernig mætti styrkja og efla sjálfstæði blaða- og fréttamannanna. Ég taldi fulla ástæðu til að fara að þeim tillögum Samf.

Hvað hitt atriðið varðar sem hv. þm. nefndi sneri það að --- hvað var það aftur? (BÁ: Það var um sjálfstæði blaðamanna hérna.) Það var um sjálfstæði blaðamanna, já. Það er rétt að sérstök fræðigrein fjallar um áhrif eigenda á blaðamenn, sjálfsritskoðun og aðra slíka hluti. Ég held að meginmunurinn á því sem ég hef sagt og því sem hv. þm. Sjálfstfl. hafa sagt sé að þeir hafa ásakað fréttamenn um að ganga erinda eigenda sinna vitandi vits um að misnota miðla sína. Ég hafna almennt slíkum ásökunum í garð frétta- og blaðamanna á Íslandi, hvort sem þeir vinna á Mogganum, hjá RÚV eða Baugi. Þar liggur kannski munurinn í málflutningnum, hv. þingmaður.

Það er kátlegt að sjá fyrrum erindreka Verslunarráðs Íslands reyna að halda uppi vörnum í þessu máli, hv. þm. Birgi Ármannsson sem sennilega hefur oftar en flestir aðrir menn skrifað erindi til Alþingis um nauðsyn þess að atvinnulífið í landinu fengi að búa við sem minnst ríkisafskipti og hversu ógnvænlegt það væri ef Alþingi ætlaði að grípa með harkalegum aðgerðum inn í eina atvinnugrein. Þegar til kastanna kemur og hann hefur verið kjörinn á Alþingi tekur hann að sér hlutverk handauppréttingavélarinnar og samþykkir hvaðeina sem fyrir hann er lagt og bergir á þeim ógeðsdrykk sem fyrir hann er borinn.