![](http://www.althingi.is/myndir/althlit.gif)
Björgvin G. Sigurðsson (andsvar):
Hæstv. forseti. Þetta var prýðileg ræða hjá hv. þm. Dagnýju Jónsdóttur og merkilegar nótur slegnar þarna sem ekki var hægt annað en að leggja eyrun grannt við. Sumt kom kannski svolítið á óvart. Ég gat ekki skilið ræðu þingmannsins öðruvísi en svo að hún væri alls ekki sátt við þá leið sem lögð er til í frv. sem hér um ræðir. Hún nefndi sérstaklega að lagasetningin mætti alls ekki verða til að draga úr fjölbreytni, þrengja skorður, skerða tjáningarfrelsi, atvinnufrelsi og eignarrétt og alls ekki ganga fram af meiri hörku en bráðnauðsynlegt væri. Þennan kafla má segja að hún hafi tvítekið í ræðu sinni og meginmálið var að lagasetningin mætti alls ekki verða til að kippa fótunum undan starfandi fjölmiðlum. Það er allt annar tónn en hefur verið að heyra í málflutningi ýmissa annarra stjórnarliða í dag og í kvöld.
Þess vegna hlýt ég að spyrja hv. þingmanninn hvort hún sé að segja þegar allt kemur til alls að hún vilji alls ekki ganga svo langt sem hér er lagt til, vilji ekki þrengja svo að því fyrirtæki sem hér er til umræðu fyrst og fremst, Norðurljósum, þannig að skipta þurfi fyrirtækinu upp sem gæti orðið til þess að hlutar þess færu einfaldlega út úr rekstri, á hausinn eins og menn segja, enda fyrirtækið Stöð 2, Íslenska útvarpsfélagið, gríðarlega skuldsett. Eins og allir vita var fyrirtækinu bjargað frá bráðagjaldþroti fyrir nokkrum mánuðum. Þess vegna spyr ég hana: Er hún að segja að málið eigi ekki að fara í gegn eins og það lítur nú út heldur taka stakkaskiptum hvað þetta varðar, ella liggja og bíða síðari umræðu?