[prenta uppsett í dálka] 108. fundur, 130. lþ.
Björgvin G. Sigurðsson (andsvar):
Hæstv. forseti. Þá liggur spurningin í augum uppi sem kom fram hjá hv. þm. Merði Árnasyni rétt áðan: Hvaða lagaákvæði eru það? Eiginlega er ekki hægt að skilja þingmanninn öðruvísi en svo að hún vildi sjá einhver ákvæði í frv. taka breytingum áður en það yrði að lögum. Þó að hún hafi því miður dregið aðeins í land og lýsi sig fylgjandi frv. eins og það liggur fyrir núna var samt ekki hægt að skilja hana öðruvísi en að eitthvað væri í því sem hún vildi sjá breytast í meðförum þingsins næstu dagana ef svo fer sem horfir að málinu verði þvælt í gegn á næstu tveimur vikum. Því blasir það við að ítreka spurninguna: Hvað vildi hún sjá breytast í frv. áður en það yrði að lögum til að tryggja að það verði ekki til að draga úr fjölbreytni, setja fjölmiðlunum þrengri skorður eða til þess að fækka miðlunum sem nú eru starfandi?
