[prenta uppsett í dálka] 108. fundur, 130. lþ.
Mörður Árnason (andsvar):
Forseti. Ég held að í andsvari mínu sem út af fyrir sig verður ekki bein spurning sé réttast að rifja það upp úr ágætri ræðu hv. þm. Katrínar Júlíusdóttur í dag þegar hún sagði að einhverjir varasömustu fjölmiðlarnir væru blankir fjölmiðlar vegna þess að á blönkum fjölmiðli, fjölmiðli sem er í hættu í rekstri sínum, getur skapast það ástand að það slakni á fagmennsku blaðamanna og að kröfur frá eigendum, frá útgefendum, til starfsmanna á blaðinu séu þær að þeir gefi eftir á sinni réttu stefnu og línu gagnvart auglýsendum eða gagnvart einhvers konar hagsmunum eigenda eða einhverra annarra sem talin er þörf á að gerist. Ég held að þetta sé afar athyglisvert og rétt hjá hv. þm. Katrínu Júlíusdóttur og ég held að það sé hættan sem við stefnum núna út í ef þetta frv. verður samþykkt, að hér verði smám saman í raun og veru bara fákeppni í fjölmiðlun.
