Sigurjón Þórðarson (andsvar):
Herra forseti. Ég fékk ekki upp úr hv. þingmanni hver váin væri. Það er enginn að tala um að bíða í nokkur ár. Við hefðum talið í stjórnarandstöðunni að það væri rétt að bíða í a.m.k. tvær vikur. Það hafa komið fram eins og hann taldi upp hér, hv. þm. Bjarni Benediktsson, alvarlegar athugasemdir við frv., að það bryti mögulega í bága við stjórnarskrána og við Evrópureglur. Finnst honum það léttvægt? Honum fannst það ekki á föstudaginn á fundi í nefndinni. Þá taldi hann rétt að hringja í og jafnvel spyrja þann sem hann starfaði í umboði fyrir í nefndinni.
Ég óska þess að hv. þingmaður svari því hvort hann starfi hér í umboði þjóðarinnar eða eingöngu í umboði hæstv. forsrh. Davíðs Oddssonar.