[27:03]

Guðjón A. Kristjánsson (um fundarstjórn):

Hæstv. forseti. Hv. þm. Össur Skarphéðinsson vék réttilega að því að við höfum séð að þingflokksformaður Framsfl. hefur rúllað niður listann nokkuð ört. Hv. þm. Magnús Þór Hafsteinsson bað um að verða færður upp á listanum. Ekki var hægt að verða við því hér fyrr í kvöld. Hann var þó að sinna störfum fyrir þingið með því að taka þátt í veislu og varð að færa sig til á mælendaskránni. Það var ekki hægt að færa hann ofar en það er endalaust hægt að færa til þingflokksformann Framsfl. niður eftir listanum. Við virðumst ekki geta fengið fram viðhorf Framsfl. í þessari umræðu á meðan við ræðum þetta mál. Það er ákaflega furðulegt, virðulegi forseti, að málin þróist með þeim hætti í umræðunni sem hér hefur verið. Ég spyr hæstv. forseta að því hvort ekki sé alveg klárt að það sama gildi varðandi þingflokksformann Frjálsl. og Framsfl. í þessu máli, að ef annar getur fært sig niður þá geti hinn fært sig upp?

Hæstv. forseti. Nú er klukkan orðin rúmlega þrjú og full ástæða til að spyrja hversu lengi fundinum verður haldið áfram. Það eru ekki nema um fjórar klukkustundir þangað til fólk þarf að rísa úr rekkju sem ætlar að mæta til funda í nefndum þingsins. Við hljótum að eiga kröfu á því að fara að vita eitthvað um hvernig þinghaldinu verður fram haldið í nótt, hvort til stendur að vinna til fjögur eða fimm eða hvort menn ætli að vinna til klukkan sjö, eða hvaða plön hafa hæstv. forsetar um að stjórna þessum fundi? Á það bara að vera í óvissu og án þess að fáist neitt skipulag á þau störf sem hér eru unnin? Eigum við þingmenn að sitja uppi með það að umræðan fari þannig fram að það verði eingöngu stjórnarandstöðuþingmenn sem tali og síðan muni e.t.v. hv. þm. og formaður þingflokks Framsfl. koma inn í umræðuna sem síðasti ræðumaður? Það er nú ekki nógu málefnalegt, hæstv. forseti, að umræðan þróist með þeim hætti að við fáum ekki að heyra viðhorf annars stjórnarflokksins í umræðunni áður en henni vindur lengra fram.