Sigurður Kári Kristjánsson (andsvar):
Herra forseti. Það er nefnilega það. Hv. þm. orðaði hugsanir sínar á rangan hátt. Það er ekki verið að koma á ritskoðun á Íslandi eins og hv. þm. hélt fram í ræðu sinni. Það er ekki verið að snerta prentréttinn (Gripið fram í: Nú?) heldur eða prentfrelsið. Alls ekki. Að sjálfsögðu ekki. Það er verið að setja ákveðin skilyrði fyrir því að fyrirtæki sem er í markaðsráðandi stöðu geti ráðið hér öllum fjölmiðlum og stjórnað lýðræðislegri umræðu. En það er ekki verið að leiða ritskoðun í lög. Það er fráleitt. (BjarnB: Skilyrði ... útvarpsleyfi.) Margt í þessari ræðu hv. þingmanns hefur hins vegar vakið athygli og þær rangfærslur sem hann hefur haft í frammi eru mjög sérstakar. Hér liggur sem sagt fyrir viðurkenning hans á því að ekki er verið að koma á ritskoðun á Íslandi, eins og hann hélt fram. Það liggur líka fyrir að hann lítur ekki á Fréttablaðið, sem heitir Fréttablaðið, sem fréttablað, heldur auglýsingablað. Allt er þetta að verða ansi öfugsnúið hjá hv. þingmanni. (Gripið fram í.)