[prenta uppsett í dálka] 120. fundur, 130. lþ.
Mörður Árnason (andsvar):
Það sem hér kemur í ljós er auðvitað enn ein birtingarmynd hins djúpstæða klofnings sem ríkir í Framsfl. um málið. Það vill til að þetta bréf hefur verið sent. Hæstv. utanrrh. Halldór Ásgrímsson getur ekki neitað því. Hann á að hafa séð það því það kom í þingflokkana. Í bréfinu stendur m.a., með leyfi forseta:
,,Alls óvíst virðist hins vegar hvort markmið um fjölbreytni í umfjöllun og öfluga dagskrárgerð náist. Það er lágmarkskrafa,`` segir borgarstjórn Reykjavíkur, ,,að nægilegur tími gefist til að fullkanna hin víðtæku áhrif sem samþykkt frumvarpsins gæti haft í för með sér.``
Hæstv. utanrrh. vitnaði í stjórnarformann nokkurn hér í bæ, í því fyrirtæki sem þessi lög beinast auðvitað gegn. Stjórnarformaðurinn sagði nákvæmlega þetta: Fyrirtækið heldur áfram þessi tvö ár í þeirri sannfæringu og þeirri fullu vissu að hægt sé að stöðva þessi lög, annaðhvort í innlendum dómstólum, héraðsdómi eða Hæstarétti, eða með Evrópurétti. Þess vegna ætla þeir að reyna að halda áfram en ekki vegna þess að frv. beinist ekki gegn neinum.
