Utanríkisráðherra (Halldór Ásgrímsson) (andsvar):
Virðulegur forseti. Ég tel enga sérstaka ástæðu til að hafa áhyggjur af þessu. Það liggur ekki neitt fyrir um það að einhver þeirra fyrirtækja sem eru nú í fjölmiðlarekstri séu markaðsráðandi þótt ákveðnar grunsemdir séu um það. Enn síður liggur fyrir að eitthvert þeirra fyrirtækja sé markaðsráðandi 1. júní 2006. Það getur ýmislegt breyst á þeim tíma. Það er engin ástæða til að fullyrða hvaða fyrirtæki verði markaðsráðandi á þeim tíma.
Ég ítreka þá skoðun mína að ég tel almennt óæskilegt að markaðsráðandi fyrirtæki séu í fjölmiðlarekstri. Það er mikil hætta á því að slík fyrirtæki misnoti aðstöðu sína. Ég er ekki að segja að þau geri það en það er veruleg hætta á því að slík fyrirtæki noti þá viðkomandi fjölmiðla fyrirtækjum sínum til framdráttar.