Forseti (Guðmundur Árni Stefánsson):
Forseti þarf svo sem ekki að bregðast mikið við þessum ábendingum hv. þingmanns. Það er rétt að í 56. gr. þingskapa segir orðrétt:
,,Forseti getur leyft þingmönnum að veita stutt andsvar við einstökum ræðum strax og þær hafa verið fluttar.``
Síðar í sömu grein segir: ,,Andsvari má einungis beina að máli ræðumanns en ekki öðru andsvari.``
Það velkist svo sem enginn í vafa um að það er ekki tilskilin regla að sá sem veitir andsvar þurfi að vera efnislega ósammála ræðumanni. Hins vegar er mjög mikilvægt að það sem í andsvari felst sé í efnislegu samhengi við þá ræðu sem flutt var. Það er kjarni málsins.