[prenta uppsett í dálka] 121. fundur, 130. lþ.
Björgvin G. Sigurðsson (um fundarstjórn):
Herra forseti. Hér hafa komið fram rökstuddar og ítarlegar kröfur og óskir til virðulegs forseta um að fresta fundi eða kalla hið snarasta til nokkra hæstv. ráðherra. Þingmenn hafa ítrekað bent forseta á að það er erfitt að halda úti málefnalegum og uppbyggilegum umræðum um frv. sem fyrir þinginu liggur án þess að hæstv. ráðherrar hafi komið í hús. Ég óskaði sérstaklega eftir því áðan að hæstv. aðalritari Framsfl., Siv Friðleifsdóttir, yrði beðin um að koma niður í þing og eiga við mig orðastað. Ég ítreka þá ósk til forseta, um hvort hann sjái sér fært að hafa við hana samband og óska eftir nærveru hennar. Ég á við hana mjög mikilvægt erindi.
Ég ítreka að það er erfitt fyrir mig að halda umræðunni áfram án þess að forseti aðstoði mig við að kveðja hæstv. ráðherra og ritara til leiks þannig að við getum skipst á skoðunum. Hún gæti kannski upplýst mig um á hvaða vegferð Framsfl. er. Ég hefði aldrei trúað því að óreyndu að Framsfl. léti teyma sig fram af bjargbrúninni. Ég hef aldrei, virðulegi forseti, getað ímyndað mér það eða aldrei ætlað Framsfl. að allt væri falt fyrir 15. september, að allt væri falt fyrir forsætisráðherrastól Halldórs Ásgrímssonar, að flokkurinn fyrirgerði æru sinni, sómakennd og pólitík fyrir 15. september.
Þetta ætlaði ég, virðulegi forseti, að ræða við virðulegan ritara flokksins, hæstv. ráðherra Siv Friðleifsdóttur. Ég vildi að sjálfsögðu einnig fá að ræða málið við varaformanninn. Ég hef getið þess fyrr í kvöld að ég tel að hann hljóti að vera heima hjá sér að jafna sig á axlartjóni og hafi því ekki séð sér fært að mæta til þingfundar og eiga við mig orðastað í nótt. Ég óskaði því eftir að þingið sendi honum fax með spurningum mínum sem ég las upp áðan. Hins vegar hef ég ekki fengið neinar vísbendingar um að ritari Framsfl. eigi við heilsuleysi að stríða. Því hef ég óskað eftir því að virðulegur ráðherrann og hávirðulegur ritarinn komi til þingfundar. Það eru átta og hálf klukkustund þangað til fundur landbn. hefst og menn gera þá væntanlega hlé á þingfundi í klukkustund. Nægur er tíminn og ef ég man rétt býr hún úti á Seltjarnarnesi og ætti að geta fengið sér ökuferð með bílstjóra sínum hingað niður eftir og rætt við mig þetta brýna mál.
