[prenta uppsett í dálka] 125. fundur, 130. lþ.
Félagsmálaráðherra (Árni Magnússon) (andsvar):
Hæstv. forseti. Við erum nú hér að lenda í umræðu um allt annað mál en það sem er til umfjöllunar. Hér er ekki verið að fjalla um 90% lánin. Ég mun taka umræðu um það mál fagnandi, vonandi á haustþingi. Vegna fyrirspurnar hv. þm. Björgvins Sigurðarsonar, þá höfðum við framsóknarmenn að sjálfsögðu gert okkur ákveðnar hugmyndir um það í kosningabaráttunni með hvaða hætti þetta yrði sett fram og sú áætlun hefur reyndar orðið fræg, því Morgunblaðið hefur birt hana í heild sinni, gerði það sl. sumar, áætlun sem ég sem þáverandi framkvæmdastjóri Framsóknarflokksins setti fram sem hugsanlega framkvæmdaáætlun í þessu efni.
Það liggur fyrir, hæstv. forseti, að þegar álit Eftirlitsstofnunar EFTA kemur fram, sem vonandi verður snemma á þessu sumri, þá mun áætlun ríkisstjórnarinnar í þessum efnum verða lögð fram. Því að ég bið hv. þingmenn að sýna þolinmæði og hlakka til að njóta stuðnings þeirra við framkvæmd málsins á haustþingi.
