Ögmundur Jónasson:
Hæstv. forseti. Nú hlær þingheimur. Eina ferðina enn á að gera mikilvægt fyrirtæki að hlutafélagi eða veita heimild til slíks. Ég held að okkur verði ekki hlátur í hug þegar fram líða stundir.
Við í Vinstri hreyfingunni -- grænu framboði erum þeirrar skoðunar að grunnþjónusta samfélagsins eigi að vera í eigu og á vegum samfélagsins. Það á að búa um rekstrarformið með þeim hætti að það stuðli að stöðugleika. Reynslan af því þegar samfélags- og stoðþjónustu er breytt í hlutafélög er sú að það er undanfari þess að þær séu markaðs- og einkavæddar.
Þegar slík fyrirtæki eru síðan sett á markað og þau verða háð afkomusveiflum og sveiflum á verðbréfamarkaði er niðurstaðan sú að stöðugleikinn í eignarhaldinu hverfur. Við erum andvíg lagasetningunni.