Helgi Hjörvar (andsvar):
Virðulegur forseti. Hv. þm. Ögmundur Jónasson heldur sig enn við það að reyna að rang- og oftúlka það sem sagt var á landsfundi Samf. um helgina.
Það er auðvitað aldeilis fráleitt að fyrir dyrum standi af hálfu Samf. einhvers konar einkavæðing, og var það sérstaklega tekið fram á landsfundinum um helgina, þ.e. í þeirri merkingu að einkavæða eigi ríkisstofnanir í heilbrigðisþjónustunni.
Hins vegar er ósköp eðlilegt að menn frá einum tíma til annars skoði með hvaða hætti markaðslausnir eiga við til að taka á þeim verkefnum sem eru í heilbrigðisþjónustunni og nauðsynlegt að benda hv. þm. Ögmundi Jónassyni á, ef hann hefur ekki kynnt sér heilbrigðiskerfið nýlega, að í því eru auðvitað fjölmörg dæmi um einkarekstur og markaðslausnir. Við höfum fjölmörg dæmi um sjálfstætt starfandi lækna, um sjálfseignarstofnanir sem reka hjúkrunarheimili, um lyfjaþáttinn í heilbrigðiskerfinu og þannig getum við haldið áfram. Það er aldeilis alveg fráleitt að halda því fram að ekki sé notast við markaðslausnir og einkarekstur í heilbrigðiskerfinu eins og það er í dag og það kerfi er bara alveg ágætt.