Forsætisráðherra (Davíð Oddsson) (andsvar):
Herra forseti. Það er kannski fullmikið sagt að segja að formaður Samf. hafi tekið þetta mál á dagskrá þó að hann tæki undir þær hugmyndir sem hv. þm. Ásta Möller hefur margoft reifað í þinginu á undanförnum árum og fleiri úr hennar flokki. En það má segja að hann hafi sett þær hugmyndir Ástu Möller og okkar á dagskrá Samf. Ég er ánægður með það. Ég fagna því og óska flokknum til hamingju með það.
Í raun var þetta það eina sem ég varð var við í fjölmiðlum að vekti virkilega athygli á landsfundi Samf. ef frá eru talin framboð sem stundum voru þar á döfinni en varð svo minna úr en til stóð í upphafi.