Grétar Mar Jónsson:
Hæstv. forseti. Ég vil byrja á því að þakka fyrirspyrjanda fyrir að vekja athygli á þessu máli. Það er mjög brýnt að fjallað sé um tekjuskiptingu sveitarfélaganna. Það hallar mjög á þau, ég tala nú ekki um sveitarfélög sem hafa orðið fyrir miklum kvótaskerðingum og standa uppi kvótalaus hringinn í kringum landið eins og víða er. Ég vil þakka þetta og bendi á að það er útilokað að taka yfir meira og setja meira á hendur sveitarfélaganna nema veruleg búbót verði gerð á tekjuskiptingunni.