![](http://www.althingi.is/myndir/althlit.gif)
Arnbjörg Sveinsdóttir:
Hæstv. forseti. Ég þakka fyrirspyrjanda spurningarnar og ráðherra svörin og sérstaklega tek ég undir það sem ráðherra nefndi hér í restina, við eigum auðvitað að gefa öllum fyrirtækjum á þessu sviði möguleika á því að vera á þessum markaði.
Ég vil aðeins draga inn í umræðuna skemmtilegt verkefni sem er í gangi. Það heitir UD, Upplýsingatækni í dreifbýli, og snýr að því að hagnýta kosti internetsins og tölvusamskipta fyrir bændur. Nú hefur verið í gangi fundaferð um landið á vegum UD-verkefnisins og Símans þar sem bændum eru kynntir kostir þess að tengjast tölvusamskiptum og þeim gert tilboð, einmitt með ISDN Plús módeminu. Það sem þetta hefur í för með sér er að eftirspurn til sveita mun vaxa mjög verulega og þess vegna er möguleiki á bættri þjónustu, m.a. með gervihnattasambandi eins og hv. þm. var að spyrja um.