Fyrirspyrjandi (Önundur S. Björnsson):
Virðulegi forseti. Ég þakka hæstv. dómsmrh. svörin.
Ég vil í þessu sambandi leggja áherslu á að fækkun og stækkun umdæma getur sannarlega átt rétt á sér. Hins vegar verður að huga vel að staðarþekkingu lögreglumanna. Hún er mjög veigamikil, ekki síst í smærri byggðarlögum úti á landi þar sem víðlendur eru miklar. Eins nefndi ég áðan að tryggja verði lágmarksþjónustu í hverju byggðarlagi, að jaðarbyggðir verði ekki út undan í stórum og víðfeðmum umdæmum.
Ég hefði einnig talið eðlilegt að í starfshópi af þessum toga hefðu fulltrúar lögreglu og sýslumanna átt sæti. Ég tel að ráðherra hafi enn þá möguleika á að bæta inn í þennan starfshóp fulltrúum þessara aðila sem eðli máls samkvæmt hafa mestu og bestu þekkingu á málaflokknum.