[prenta uppsett í dálka] 41. fundur, 130. lþ.
Dómsmálaráðherra (Björn Bjarnason):
Virðulegi forseti. Þar sem ég fékk ekki orðið áðan út af ummælum hv. þm. Marðar Árnasonar, vil ég láta þess getið að það var engin björgunaráætlun til í Vestmannaeyjum þegar þetta gekk yfir þar, sem gekk út á það að nota skipin með þeim hætti sem gert var til að flytja fólkið á brott. Það var heppni og tókst giftusamlega, sem betur fer, og síst af öllu ber að draga það mál inn í þær umræður sem hér eru, hve giftusamlega það allt tókst, og sýnir hversu fjarstæðukenndur þessi málflutningur er.
Varðandi þá fyrirspurn sem ég er að svara hér þá er spurt: ,,Hvað er því til fyrirstöðu að fjarskiptamiðstöð lögreglu í Skógarhlíð þjóni öllu landinu?``
Þjónusta fjarskiptamiðstöðvar lögreglunnar byggir á TETRA-fjarskiptakerfinu sem gerir kleift að fylgjast með ferðum löggæslubifreiða og löggæslumanna á tölvuskjá og beina þeim á afbrota- eða slysastað. Stöðin getur ekki viðhaft sams konar stýringu við löggæslu í öðrum landshlutum nema til komi útfærsla á þjónustu TETRA -kerfisins. Einnig þyrfti þá einhver starfsmannafjölgun að koma til. Hins vegar er rétt að geta þess að fjarskiptamiðstöð lögreglunnar veitir lögregluliðum á landsbyggðinni þjónustu með ýmiss konar miðlun upplýsinga í tölvukerfum sem lögreglan hefur aðgang að fyrir lögreglumenn sem staddir eru fjarri lögreglustöð sinni.
