Forseti (Halldór Blöndal):
Borist hafa tvö bréf um fjarvistir þingmanna. Hið fyrra er frá 5. þm. Suðvest., Siv Friðleifsdóttur, dags. 6. desember 2003, og hljóðar svo:
,,Þar sem ég er á förum til útlanda í opinberum erindum og get því ekki sótt þingfundi á næstunni óska ég eftir því, með vísun til 2. mgr. 53. gr. þingskapa, að varamaður minn á lista Framsfl. í Suðvest., Páll Magnússon, aðstoðarmaður ráðherra, Kópavogi, taki sæti mitt á Alþingi á meðan.
Virðingarfyllst,
Siv Friðleifsdóttir, 5. þm. Suðvest.``
Páll Magnússon hefur áður tekið sæti á Alþingi og er boðinn velkominn til starfa á ný.
Hið síðara er frá 5. þm. Norðvest., Guðjóni A. Kristjánssyni, dags. 6. desember 2003:
,,Þar sem ég get ekki sótt þingfundi á næstunni af einkaástæðum óska ég eftir því, með vísan til 2. mgr. 53. gr. þingskapa, að 1. varamaður á lista Frjálslynda flokksins í Norðvest., Steinunn K. Pétursdóttir fulltrúi, Akranesi, taki sæti mitt á Alþingi á meðan.``
Kjörbréf Steinunnar K. Pétursdóttur hefur þegar verið rannsakað og samþykkt en hún hefur ekki áður tekið sæti á Alþingi og ber því að undirskrifa drengskaparheit að stjórnarskránni.