Sigurjón Þórðarson (andsvar):
Herra forseti. Það er mjög alvarlegt að þetta lendi á fiskvinnslunum vegna þess að þetta muni einkum lenda á þeim fiskvinnslum sem eru ekki í tengslum við útgerð. Þær fiskvinnslur búa nú þegar við skerta samkeppnisstöðu. Við sem sitjum á hinu háa Alþingi ættum frekar að leitast við að jafna samkeppnisstöðu í landinu í staðinn fyrir að koma með enn eina lagasetninguna sem mun gera þessum fyrirtækjum erfiðara fyrir.