Ásta R. Jóhannesdóttir (andsvar):
Virðulegi forseti. Í tíð þessarar ríkisstjórnar hófst skattlagning á lífeyrisþega, á strípaðar bætur lífeyrisþega þannig að allir þeir sem eru bara með lágmarkslífeyri borga af honum skatt. Í dag er það svo og því spyr ég hæstv. ráðherra. Hann er að setja 1 milljarð í viðbótarörorkuuppbót. Má ekki segja að þegar búið er að taka skattinn af því þá séu um 400 millj. að koma aftur í ríkissjóð af þessum milljarði þannig að raunútgjöld ríkissjóðs vegna þessara breytinga séu ekki nema um 600 millj.? Ég spyr hæstv. ráðherra: Hefði hann ekki getað staðið við útreikninginn sem um var talað í upphafi við Öryrkjabandalagið í ljósi þess að verið er að taka 40% af þessu aftur inn í ríkissjóð í skatt?