Heilbrigðisráðherra (Jón Kristjánsson) (andsvar):
Virðulegi forseti. Ég hygg að hv. þm. Ögmundur Jónasson leggi dálítið frílega út af mínum orðum vegna þess að í lok ræðu minnar sagði ég að þegar þessi stormur væri liðinn, og ég vona að hann gangi yfir, héldi réttindabarátta öryrkja áfram og ég er tilbúinn til að taka þátt í henni. Meiri árás hef ég ekki gert á Öryrkjabandalagið. En það er náttúrlega alveg ljóst að það hefur verið hart tekist á í þessu máli. Það hefur verið mikil auglýsingaherferð. Við framsóknarmenn höfum verið nefndir í þeirri herferð. En ég mun ekki láta það til frambúðar trufla mig.