Birkir J. Jónsson (andsvar):
Hæstv. forseti. Ég virðist hafa slegið á frekar viðkvæman streng í hjarta hv. þm. Kristjáns L. Möllers. Það er ljóst að stefna Samf. er að fyrna allan kvóta af Útgerðarfélagi Akureyrar og þeim fyrirtækjum sem hafa byggt upp myndarlega landvinnslu á mörgum stöðum um allt land.
Ég spyr á móti: Hvað verður um atvinnuöryggi þess fólks sem vinnur hjá þessum fyrirtækjum? Ég get frætt hv. þm. um eitt, að stöðugleikinn á þeim stöðum sem hv. þm. nefndi áðan hefði ekki orðið meiri ef menn hefðu ætlað að fyrna veiðiheimildir á þeim stöðum. Það er alveg á hreinu. Ég vil bara að hv. þm. svari mér því hver stefna Samf. er í kvótamálum. Hann svaraði því ekki í fyrra andsvari og nú vil ég fá að vita um stefnu Samf. í sjávarútvegsmálum.