Tilmæli fastanefndar Bernarsáttmálans.
umhverfisráðherra (Sigríður A. Þórðardóttir) (S):
Frú forseti. Það er alveg ljóst að umhverfisyfirvöld á Íslandi taka fyrirmæli fastanefndar Bernarsamningsins alvarlega og það liggur alveg fyrir hver fyrirmælin eru frá því á síðasta fundi og þau mál eru til skoðunar í umhverfisráðuneytinu eins og ég greindi frá í fyrri ræðu minni. Hvað snertir t.d. Kárahnjúkavirkjunina og umhverfið þar er þegar eftirlits- og vöktunarnefnd þar að störfum. Ég tel því að verið sé að vinna markvisst í þessum málum.
Ég vil líka minna á að á sínum tíma var Eyjabakkasvæðinu þyrmt vegna þess að þar eru mjög mikilvæg svæði m.a. fyrir heiðagæsina og lífríki landsins. Við megum ekki gleyma því að þannig standa málin.