Rannsóknamiðstöð á sviði landverndar og landgræðslu.
Hæstv. forseti. Af því hv. þingmaður var að ræða um að Landgræðslan, eða þessi stofnun gæti verið með ráðgjöf fyrir aðrar þjóðir, þá vil ég upplýsa að svo er í dag. Ég veit að á milli Íslands og Grænlands t.d. er mjög mikið samstarf í landgræðslumálum. Hér hefur líka verið afar merkilegur maður frá Nýfundnalandi, prófessor, sem hefur verið að rannsaka mikið í kringum Keldur, uppgræðsluna þar og sandvarnargarða sem eru mjög merkilegir. Þeir eru mjög gamlir og voru hlaðnir upp til að varna sandfoki. Það er í rauninni mjög merkileg smíð á þeim görðum. Þetta er allt hlaðið úr grjóti og á þeim eru hlið sem taka við sandinum út aftur þegar breytir um vindátt.
Á bænum mínum á Keldum var mikil barátta við sandfok árum og áratugum saman. Það er til saga um að í einu miklu roki sem gekk yfir Rangárvellina hafi verið alveg sléttfullt af sandi upp á mæni á gamla bænum. En ég vildi bara koma hér og segja frá því að Landgræðslan á mjög gott samstarf við margar þjóðir, sem betur fer.