Frú forseti. Það skiptir miklu máli að allt sem mögulegt er sé gert til að koma í veg fyrir innflutning á fíkniefnum. Við eigum ekki að horfa í peninginn í því efni þegar við horfum á það mikla böl sem fíkniefnin valda þeim sem ánetjast þeim. Við metum það ekki til fjár þegar hægt er að fara í aðgerðir eins og þær að kaupa gegnumlýsingartæki til að fylgjast með vörusendingum í gámum. Þá hljótum við að gera það.

Við höfum náð árangri á Keflavíkurflugvelli. Það eru göt í kerfinu á Seyðisfirði og í þessum vörugámum. Auðvitað eigum við að bregðast við og þétta þau göt. Fyrsta skrefið er að kaupa þetta gegnumlýsingartæki, næsta skref að efla fíkniefnaeftirlit á Seyðisfirði.