Samkomudagur Alþingis og starfstími þess.
Virðulegi forseti. Nú hygg ég að það sé svo með flesta þingmenn, a.m.k. með okkur landsbyggðarþingmenn, að við erum mjög mikið að störfum þegar þing er ekki starfandi, t.d. í jólahléum og líka í sumarhléum. Við erum á þeytingi fram og til baka um kjördæmi okkar og jafnvel í annarra manna kjördæmum. Í litlum þingflokki eins og mínum eru þingmenn jafnframt háttsettir í sjálfum flokknum, formaður og varaformaður, og því fylgja skyldur um að mæta til funda og ráðslags víða um land. Það að finna sér eitthvað að gera er ekki vandamál í þessu starfi.
Það sem mér finnst að hægt væri að græða á því að þingmenn fengju tækifæri til að fara út í kjördæmi sín á þingtíma væri að þá gætu þeir náð betra sambandi við fólk til að ræða um málefni líðandi stundar, m.a. þingmál sem eru í gangi í þinginu á hverjum tíma. Upp gætu komið mál sem gætu orðið tilefni til umræðu í þinginu og af því gætu sprottið tilefni til fyrirspurna. Ég fæ oft hugmyndir að fyrirspurnum þegar ég tala við fólk í mínu eigin kjördæmi. Manni dettur ýmislegt í hug og stundum hefur það jafnvel leitt af sér frumvörp til laga, þingsályktunartillögur eða annað þess háttar. Sambandið við kjósendur, það að fá að hitta fólk í þeirra eigin umhverfi, er ákaflega dýrmætt fyrir alla þingmenn.