Virðulegur forseti. Eins og hv. þingmaður þekkir voru samþykktar hér á Alþingi sérstakar fjárveitingar til rannsókna í Bakkafjöru, 200 millj. kr. Það var í samræmi við tillögur sem ég hafði lagt fram og voru byggðar á grunni tillagna sérstakrar nefndar sem fjallar um samgöngur við Eyjar. Fyrsti kostur þeirrar tillögu var að kanna Bakkafjöru. Algerlega er unnið eftir þeirri samþykkt. Alþingi samþykkti fjárveitingar til að fara í Bakkafjöru og kanna hvort sú leið er fær. Það mun liggja fyrir um miðjan marsmánuð og þá verður tekin ákvörðun um framhaldið. Allt bendir til þess að framkvæmdir séu mögulegar í Bakkafjöru og þá liggur fyrir samþykkt Alþingis, um að hefja hönnun og undirbúning að framkvæmdum við Bakkafjöru. Spurningunni er því þegar svarað.