Frú forseti. Hv. þm. Sigurður Kári Kristjánsson vakti athygli á því að verið væri að auðvelda tveimur fjármálastofnunum veðsetningu. Ástæðan er sú að í stað þess að setja gömlu bankana í þrot á sínum tíma ákváðu stjórnvöld sem voru við völd í október 2008 að reisa nýja banka á grunni þeirra gömlu. Ég velti því fyrir mér eftir ræðu hv. þingmanns hvort hann hafi verið sammála þessum gjörningi, þ.e. að keyra ekki gömlu bankana í þrot á sínum tíma. Það hefði að mínu áliti gert uppgjörið, sem nú er í gangi og frumvarpið er hluti af, milli nýju og gömlu bankanna mun skýrara og auðveldara, ekki síst fyrir löggjafann.