Ferill 780. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1463 — 780. mál.
Svar
innanríkisráðherra við fyrirspurn frá Fanný Gunnarsdóttur
um sveitarfélög og eigendur sumarhúsa.
1. Hverjar eru lagalegar skyldur sveitarfélaga gagnvart eigendum sumarhúsa eða formlegum félögum sumarhúsaeigenda?
Sé eigandi sumarhúss búsettur í því sveitarfélagi þar sem sumarhúsið er staðsett ber sveitarfélagið allar sömu skyldur gagnvart honum og öðrum íbúum sveitarfélagsins. Sé eigandi sumarhúss búsettur í öðru sveitarfélagi tengjast skyldur þess sveitarfélags þar sem sumarhúsið er staðsett fyrst og fremst fasteigninni sjálfri. Fer það nokkuð eftir aðstæðum á hverjum stað hverjar þær skyldur nákvæmlega eru, en nefna má skyldur sveitarfélaga á sviði skipulagsmála, brunavarna og fráveitu.
2. Eru í gildi einhver lög eða reglur um upplýsingagjöf sveitarfélaga til eigenda sumarhúsa eða sumarhúsafélaga?
Samkvæmt 24. gr. laga um frístundabyggð og leigu lóða undir frístundahús, nr. 75/2008, getur a.m.k. helmingur félaga í frístundabyggð í sveitarfélagi sameinast um að óska eftir því við sveitarstjórn eða sveitarstjóra að haldinn sé fundur til að veita upplýsingar um sameiginleg hagsmunamál frístundabyggðanna og sveitarfélagsins. Skal þá sveitarstjórn, eða eftir atvikum sveitarstjóri, að öðru jöfnu bjóðast til að halda slíkan fund með fulltrúum allra félaga í sveitarfélaginu. Sveitarstjórn, eða eftir atvikum sveitarstjóri, þarf ekki að bjóðast til að halda slíkan fund oftar en einu sinni á hverju ári. Lög þessi eru á málefnasviði velferðarráðuneytisins.
Ekki eru í lögum önnur ákvæði sem fjalla sérstaklega um upplýsingagjöf sveitarfélaga til eigenda sumarhúsa eða sumarhúsafélaga umfram þá almennu upplýsingagjöf sem felst m.a. í auglýsingu skipulagsáætlana og þess háttar.
Rétt er að taka fram í þessu sambandi að í 102. gr. sveitarstjórnarlaga, nr. 138/2011, er fjallað um rétt íbúa til áhrifa á stjórn sveitarfélags. Segir þar að sveitarstjórn skuli leitast við að tryggja íbúum sveitarfélagsins og þeim sem njóta þjónustu þess möguleika til að taka þátt í og hafa áhrif á stjórn sveitarfélagsins og undirbúning stefnumótunar. Þar sem í ákvæðinu er ekki aðeins vísað til íbúa sveitarfélagsins heldur einnig þeirra sem að öðru leyti njóta þjónustu þess tekur það einnig til eigenda fasteigna í sveitarfélagi sem ekki hafa þar jafnframt lögheimili. Í 2. mgr. ákvæðisins eru nefndar nokkrar mögulegar aðferðir sem sveitarfélögin geta nýtt sér í þessu skyni, en rétt er að undirstrika að ekki er um lögbundna samráðsskyldu að ræða.
3. Eru einhverjar reglur í gildi um aðgengi sumarhúsaeigenda eða stjórnarmanna í félögum sumarhúsaeigenda að sveitarstjórnum?
Ekki umfram það sem rakið hefur verið í svari við 2. tölul. fyrirspurnarinnar.