Ferill 136. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 417 — 136. mál.
2. umræða.
Nefndarálit með breytingartillögu
um frumvarp til laga um breytingu á lögum um framhaldsfræðslu, nr. 27/2010 (stjórn Fræðslusjóðs).
Frá allsherjar- og menntamálanefnd.
Nefndin hefur fjallað um málið og fengið á sinn fund Evu Margréti Kristinsdóttur og Hildi Margréti Hjaltested frá félags- og vinnumarkaðsráðuneytinu.
Nefndinni barst ein umsögn um málið, frá BSRB.
Með frumvarpinu er kveðið á um breytingu á 11. gr. laga um framhaldsfræðslu, nr. 27/2010, til að tryggja að ráðherra sem fer með mál er varða fræðslumál tilnefni einn fulltrúa í stjórn Fræðslusjóðs. Með forsetaúrskurði nr. 6/2022, um skiptingu stjórnarmálefna milli ráðuneyta í Stjórnarráði Íslands, fluttist málaflokkur fræðslumála og málefni Fræðslusjóðs frá þáverandi mennta- og menningarmálaráðuneyti til félags- og vinnumarkaðsráðuneytisins og skipar því félags- og vinnumarkaðsráðherra nú formann stjórnar fræðslusjóðs skv. 1. mgr. 11. gr. laga um framhaldsfræðslu.
Breytingartillögur.
Við umfjöllun nefndarinnar kom fram að Félag íslenskra framhaldsskóla sem er mælt fyrir um í 2. málsl. 1. mgr. 11. gr. laganna að tilnefni einn fulltrúa í stjórn Fræðslusjóðs sé ekki lengur starfandi en að Skólameistarafélag Íslands hafi tekið við hlutverki þess félags. Því leggur nefndin til breytingu þess efnis.
Til þess að gæta að innbyrðis samræmi í löggjöf og tryggja rétta notkun heitis heildarsamtaka stéttarfélaga starfsmanna í almannaþjónustu í 1. mgr. 11. gr. laganna leggur nefndin til breytingu þess efnis að heitið BSRB komi í stað orðanna Bandalag starfsmanna ríkis og bæja.
Að framangreindu virtu leggur nefndin til að frumvarpið verði samþykkt með eftirfarandi
BREYTINGU:
Við 1. gr. bætist nýr liður, a-liður, svohljóðandi: Í stað orðanna „Bandalag starfsmanna ríkis og bæja og Félag íslenskra framhaldsskóla“ í 2. málsl. 1. mgr. 11. gr. laganna kemur: BSRB og Skólameistarafélag Íslands.
Bergþór Ólason og Birgir Þórarinsson voru fjarverandi við afgreiðslu málsins. Sigmar Guðmundsson, áheyrnarfulltrúi, er samþykkur áliti þessu.
Alþingi, 24. október 2022.
| Bryndís Haraldsdóttir, form. |
Lilja Rannveig Sigurgeirsdóttir, frsm. |
Arndís Anna Kristínardóttir Gunnarsdóttir. |
| Bjarni Jónsson. | Eyjólfur Ármannsson. | Helga Vala Helgadóttir. |
| Jóhann Friðrik Friðriksson. |
