Ferill 534. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 750 — 534. mál.
2. umræða.
Nefndarálit með breytingartillögu
um frumvarp til laga um breytingu á lögum um almannatryggingar, nr. 100/2007 (frítekjumark og skerðingarhlutfall).
Frá meiri hluta velferðarnefndar.
Nefndin hefur fjallað um málið og fengið á sinn fund Ágúst Þór Sigurðsson og Hildi Sverrisdóttur Röed frá félags- og vinnumarkaðsráðuneyti.
Markmið frumvarpsins er að stuðla að því að einstaklingar sem metnir hafa verið til ör orku og/eða misst hafa hluta starfsgetu sinnar geti aflað sér hærri tekna með atvinnu áður en tekjurnar komi til lækkunar á greiðslum til örorku- eða endurhæfingarlífeyrisþega. Lagðar eru til breytingar á lögum um almannatryggingar, nr. 100/2007, annars vegar er varðar skerðingarhlutfall tekna við útreikning örorku- og endurhæfingarlífeyris og hins vegar er varðar sérstakt frítekjumark örorku- og endurhæfingarlífeyrisþega vegna atvinnutekna við útreikning tekjutryggingar og heimilisuppbótar.
Meiri hlutinn bendir á að frumvarpinu er ætlað að bæta lífskjör og lífsgæði einstaklinga með mismikla starfsgetu með því að stuðla að aukinni atvinnuþátttöku þeirra án þess að það hafi áhrif til lækkunar á örorku- eða endurhæfingarlífeyri þeirra. Þá vill meiri hlutinn vekja athygli á að frumvarpið inniheldur skref í átt að nýju greiðslukerfi vegna starfsgetumissis en gert er ráð fyrir að frekari breytingar á kerfinu verði innleiddar í áföngum á næstu misserum.
Meiri hlutinn leggur til eina breytingu sem er tæknilegs eðlis og þarfnast ekki skýringa.
Að framangreindu virtu leggur meiri hlutinn til að frumvarpið verði samþykkt með eftirfarandi
BREYTINGU:
2. gr. orðist svo:
Í stað orðanna „1. janúar 2013 til og með 31. desember 2022 hafa 1.315.200 kr. frítekjumark“ í 14. tölul. ákvæðis til bráðabirgða í lögunum kemur: 1. janúar 2023 til og með 31. desember 2023 hafa 2.400.000 kr. frítekjumark.
Guðbrandur Einarsson, áheyrnarfulltrúi í nefndinni, lýsir sig samþykkan áliti þessu.
Alþingi, 7. desember 2022.
Líneik Anna Sævarsdóttir, form., frsm. |
Ásmundur Friðriksson. | Guðrún Hafsteinsdóttir. | |
Hafdís Hrönn Hafsteinsdóttir. | Jódís Skúladóttir. | Lenya Rún Taha Karim. | |
Oddný G. Harðardóttir. | Óli Björn Kárason. |