umsókn Íslands um aðild að Evrópusambandinu.
Hæstv. forseti. Ég þakka hv. þingmanni fyrir ræðuna. Ég ber mikla virðingu fyrir skoðunum hv. þingmanns sem er þeirrar skoðunar að við eigum að ganga í Evrópusambandið. Hún hefur verið trú þeirri skoðun sinni og rökstutt hana og er hrein og bein með það. Ég fagna því að hv. þingmaður telur að við eigum ekki að vera í neinum feluleik með aðlögunina, ég skil heldur ekki þá umræðu. Það er öllum ljóst að aðlögun er í gangi, engu að síður er því neitað af hæstv. utanríkisráðherra að svo sé. Ég fagna því að hv. þingmaður tekur ekki þátt í slíku og hefur ekki verið neitt feimin við að lýsa því yfir að aðlögun sé í gangi.
Ég vil ekki leggja hv. þingmanni orð í munn í ljósi síðustu orðaskipta en mér heyrðist hv. þingmaður segja áðan að stefnan væri að ganga í Evrópusambandið og afnema þar með gjaldeyrishöftin og fá stuðning til þess. Hver hefur þá stefnu? Er það ríkisstjórnin? Er það Samfylkingin? Eða misskildi ég orð hv. þingmanns?