fjárlög 2013.

Virðulegur forseti. Ég þakka hv. þingmanni fyrir ágæta ræðu áðan. Til að byrja með nefndi hv. þingmaður frumjöfnuð og heildarjöfnuð sem mér finnst rétt að halda til haga, staðreyndum í því. Frumjöfnuður, þ.e. jöfnuður í ríkisrekstrinum fyrir utan vaxtatekjur og vaxtagjöld, var neikvæður upp á 43 milljarða í fyrra, á árinu 2011. Hann verður jákvæður í ár upp á 32 milljarða kr. og í fjárlagafrumvarpinu sem við fjöllum um núna er gert ráð fyrir að frumjöfnuður verði jákvæður um 60 milljarða á næsta ári, sem eru 3,2% af vergri landsframleiðslu. Heildarjöfnuðurinn sem var neikvæður um 216 milljarða kr. árið 2009, reiknað er með að hann verði rétt innan við 3 milljarða í mínus á næsta ári, sem er rétt um hundraðasti hluti af því sem þá varð.

Í framhaldi af því sem hv. þingmaður nefndi áðan varðandi fjárfestingaráætlun sem ég átta mig ekki alveg á, mig langar til að fá nánari skýringu á því. Er hv. þingmaður í heildina séð andsnúin þeim verkefnum sem þar eru tilgreind, rétt eins og þau sem hv. þingmaður nefndi og tiltók sérstaklega, eða er hún í heildina andsnúin áætluninni sem slíkri? Ég hjó eftir því að hv. þingmaður nefndi einhvers konar skóflustungufjárfestingaráætlun, eitthvað slíkt, og nær hefði verið að eyða þessu í innviðina, sem er alveg hárrétt hjá hv. þingmanni. Hluti af henni er til dæmis innviðir í samgöngumálum á Austfjörðum, þ.e. að tengja saman firði, Norðfjörð og Eskifjörð, það er stór hluti af þessari fjárfestingaráætlun. Er hv. þingmaður í heildina andsnúin fjárfestingaráætluninni, tekjuöfluninni sem á að knýja hana áfram eða getur hv. þingmaður fellt sig við einstaka þætti þar inni?