vernd og orkunýting landsvæða.
Virðulegi forseti. Ég vil þakka hv. þm. Árna Johnsen fyrir þessa yfirgripsmiklu ræðu og hvernig hann nálgast viðfangsefnið. Ég held að hv. þingmaður komist einmitt að kjarna málsins í umfjöllun sinni. Hv. þingmaður gerir það kannski ekki á fræðilegan hátt eða greinir ákveðna þætti heldur fjallar um málið eins og það blasir einfaldlega við almenningi í landinu og íbúum þessara svæða. Það eru fáir þingmenn sem eru jafnduglegir við að halda tengslum við sín svæði og hv. þingmaður, sem í framboðstilkynningu sinni sagði að fáir á Alþingi gætu státað af því að vera eins og heimamenn í hverju þorpi í kjördæmi sínu.
Þannig skil ég einmitt hv. þingmann þegar hann talar um að þessir ágætu stjórnarflokkar, Vinstri hreyfingin – grænt framboð og Samfylking, séu að tilkynna að þeir ætli ekki að bjóða fram í Suðurkjördæmi. Ef við skoðum þessa tillögu er það einmitt svo að þær færslur sem hafa átt sér stað frá faglega matinu hafa allar orðið í kjördæmi hv. þingmanns. Þá hljóta margir að spyrja sig: Hvers eiga íbúar kjördæmisins að gjalda? 5–6 þús. störf, 270 milljarðar, 4–6% hagvöxtur. Ég vil taka undir með hv. þingmanni hvað þetta snertir og fagna nálgun hans á viðfangsefninu.
Við hv. þingmaður sitjum saman í umhverfis- og samgöngunefnd og sá sem hér stendur mat það strax svo að talsmaður málsins væri ekki tilbúinn til neinnar málamiðlunar. Hvað finnst hv. þingmanni um starfið í umhverfisnefnd í þessu máli? Getur hv. þingmaður kannski farið aðeins yfir það hvernig sú vinna blasti við hv. þingmanni?