verslun með áfengi og tóbak o.fl.

Hæstv. forseti. Framkvæmdastjóri Haga sagði líka þegar hann opnaði sig núna fyrir nokkrum dögum eða klukkustundum að hann væri fylgjandi takmörkunum. Þeir biðu eftir að ríkið setti takmarkanir. Þær takmarkanir munu vera í þágu stóru verslunarkeðjanna sem allar óska eftir því að frumvarpið nái fram að ganga.

Allir umsagnaraðilar um frumvarpið eru því andvígir, nema hagsmunaaðilar í verslun. Það er staðreyndin í málinu. Þegar æskulýðssamtök, forvarnaaðilar, íþróttahreyfingin, ungmennasamtök, félög lækna, heilbrigðisstétta, landlæknisembættið, biðja okkur um að hafna frumvarpinu, eigum við virkilega ekki að hlusta á þá aðila? Ef það er rétt sem hv. þingmaður sagði að hann hefði ekki farið út í stjórnmál út af þessu frumvarpi og þetta væri ekki stórmál í hans huga, en ef þetta er vilji þessara aðila, eigum við ekki að taka tillit til þess og fara að þeim vilja? Sýna fólkinu þá virðingu?