breytt skipan ráðuneyta í Stjórnarráði Íslands.
Virðulegi forseti. Ég þakka hv. þingmanni fyrir andsvarið. Ég hef verið mikill talsmaður þess að við aukum rafræna stjórnsýslu, og já, ég tel að það sé svigrúm til þess í fjárlögum að bregðast við slíku. Hvort við erum nákvæmlega sammála og hvort allir eru sammála um hvað eru réttar leiðir í þeim efnum þori ég ekki að segja til um. En við sjáum svo mörg tækifæri í hagræðingu og ekki síst betri þjónustu, fyrir utan gegnsæið og mikilvægi þess að stjórnsýsla okkar sé öll gegnsæ og opin.
Ég fagna sameiginlegum áhuga okkar á þessu málefni og efast ekki um að hann leynist víða á þingi og vonandi líka í ráðuneytunum. Það er nákvæmlega þess vegna sem ég var að tala um mikilvægi þess að það væru miðlægar einingar í Stjórnarráðinu sem héldu utan um þessi mál, við værum ekki að finna upp hjólið í hverju ráðuneyti fyrir sig, frekar en í hverri sveitarstjórn fyrir sig, eins og ég hef fjallað um á þeim vettvangi, heldur myndum við byggja upp miðlæga þekkingu og kunnáttu sem mun síðan nýtast í öllum ráðuneytum og víða í opinbera geiranum.