fjárlög 2021.
Virðulegur forseti. Ég tek undir með hv. þm. Oddnýju G. Harðardóttur, þetta er verulega góð tillaga. Hér er m.a. lagt til að veittar verði 30 milljónir til að efla atvinnu- og menntunarúrræði á Suðurnesjum. Við þekkjum öll stöðuna sem þar er. Ríkisstjórnin hefur fyrir nokkru samþykkt að setja þurfi á fót menntanet í samstarfi við menntastofnanir á svæðinu. Fyrirhugað er að ráðstafa 300 milljónum til að kaupa þjónustu af menntaneti á Suðurnesjum til að efla náms- og starfsúrræði fyrir atvinnuleitendur á svæðinu. Stofnframlag og kostnaður við rekstur netsins gæti orðið í kringum 70 millj. kr. á næstu þremur árum eins og fram kemur í ítarlegu nefndaráliti meiri hlutans. Hér er einnig talað um verkefni eins og Nám er tækifæri og fleiri mjög góð verkefni.