móttaka flóttafólks frá Palestínu.

Forseti. Ég þakka hæstv. forsætisráðherra fyrir svar sitt. Fjölskyldusameining er eitt en flóttamenn eru annað og ég var meira að biðja um að svara því hvort við værum til í að taka á móti fjölda flóttafólks eins og hefur verið gert fyrir þau sem koma frá Úkraínu. Nú eru 20 dagar liðnir frá því að Alþingi ályktaði að án tafar skyldi komið á vopnahléi af mannúðarástæðum á Gaza-svæðinu. Alþingi krafðist þess að alþjóðalögum væri fylgt í einu og öllu í þágu mannúðar, öryggis almennra borgara og verndar borgaralegra innviða. Hvernig hefur ríkisstjórnin fylgt þessari áætlun þingsins eftir? Í hvaða aðgerðir hefur verið ráðist á síðustu tæpum þremur vikum? Hefur verið skoðað að koma á viðskiptabanni á Ísrael eða hvort slíta eigi stjórnmálasambandi milli Íslands og Ísraels? Eða hefur þessi þingsályktunartillaga sem samþykkt var með öllum atkvæðum litla þýðingu í huga ríkisstjórnarinnar?