Fáliðuð lögregla.
Virðulegi forseti. Blessunarlega er samfélag okkar í sífelldri þróun og þeirri þróun fylgja nýjar áskoranir sem krefjast öflugrar löggæslu. Mér sýnist þingheimur vera tiltölulega sammála um það, miðað við þær ræður sem hafa verið fluttar hér í dag. Á undanförnum misserum höfum við því miður orðið vitni að fjölgun tilfella þar sem gripið er til vopna en slík tilfelli krefjast skjótra og skilvirkra viðbragða úthvíldra og vel þjálfaðra lögreglumanna. Lögreglan okkar glímir að sama skapi við fjölda nýrra áskorana, allt frá netglæpum til skipulagðrar glæpastarfsemi. Svo má ekki gleyma hinni gríðarlegu fjölgun ferðamanna sem eru að lenda í alls konar óhöppum víða um land. Allt krefst þetta fleiri lögreglumanna en við höfum ekki náð að bregðast við þessum nýju áskorunum með því að fjölga þeim í takt við nýjar þarfir. Fjölmennara lögreglulið gæti lagt sitt af mörkum til samfélagslöggæslu en mikilvægt er að byggja upp sterk tengsl milli löggæslu og samfélagsins sem lögreglan þjónar til að viðhalda trausti og efla samvinnu. Með fleiri lögreglumönnum á vettvangi getum við fjárfest í forvörnum sem byggja brýr og skapa öruggari hverfi.
Við skulum líka íhuga þann toll sem þetta krefjandi starf tekur af lögreglumönnunum okkar. Mikil yfirvinna og undirmannaðar deildir leiða til kulnunar og skerts starfsanda og að lokum leiðir það til minnkaðra gæða þjónustunnar sem veitt er. Með því að fjölga lögreglumönnum tökum við ekki aðeins á þeim brýnu vandamálum sem samfélag okkar stendur frammi fyrir heldur tryggjum einnig að löggæslufólk okkar hafi þann stuðning og þau úrræði sem þau þurfa til að sinna skyldum sínum á skilvirkan hátt.
Að lokum, virðulegur forseti, má segja að þörfin fyrir fleiri lögreglumenn snúist ekki bara um að bregðast við vaxandi glæpatíðni. Það er fjárfesting í öryggi og velferð samfélagsins. Með því að fjölga í lögregluliðinu tökum við frumkvæði að því að takast á við áskoranir nútímans og skapa grundvöll fyrir öruggari og farsælli framtíð. Við skulum sameinast um að styðja við löggæslustofnanirnar okkar sem eru okkur svo mikils virði og viðurkenna mikilvægt hlutverk þeirra við að varðveita samfélagsgerð okkar.
