breytingar á löggjöf um hælisleitendur og aðstoð við þá.
Hæstv. forseti. Ég þakka hv. þm. Sigmundi Davíð Gunnlaugssyni fyrir fyrirspurnina. Því er til að svara að við höfum verið, íslensk stjórnvöld, að skoða með hvaða hætti væri hægt að ná í fólk, ef við getum orðað það þannig, niður á Gaza, þ.e. að slík aðgerð, það að aðstoða þá dvalarleyfishafa sem þar eru staddir og eiga rétt á sameiningu við sínar fjölskyldur hér heima á Íslandi, þarfnast diplómatískrar aðkomu íslenskra stjórnvalda. Utanríkisráðherra tilkynnti um það núna heildaum helgina að hann hefði sent starfsfólk á svæðið til að kynna sér aðstæður og athuga með hvaða hætti væri hægt mögulega að koma fólkinu til aðstoðar. Ég hef ekki heyrt talað um neinar mútur í því samhengi þannig að því sé haldið algerlega til haga, enda myndu íslensk stjórnvöld ekki fara út í einhverjar slíkar aðgerðir.
Hv. þingmaður spyr síðan: Hvert er samhengi þessa máls og mögulegra breytinga á málaflokknum í heild sinni? Það hefur vissulega átt sér stað vinna í ráðherranefnd um útlendinga og innflytjendur þar sem ýmsar hugmyndir hafa verið reifaðar um heildstæða nálgun á þessum málaflokkum, sem ég held að sé jákvætt. Þar höfum við verið að ræða meira um inngildingu í samfélagið. Við höfum verið að ræða má segja ferlið allt frá því að fólk kemur hingað til lands, hvort sem það er í gegnum hælisleitendakerfið eða sem innflytjendur, og síðan áframhaldandi búsetu hérlendis með tilliti til aðlögunar að samfélaginu. Við höfum ekki verið að líta á þetta sem hluta af því verkefni sem er að aðstoða fólk við að koma (Forseti hringir.) hingað sem dvalarleyfishafar og sem tengist þá (Forseti hringir.) fjölskyldusameiningunni niðri á Gaza, þannig að það hefur engin slík samþykkt (Forseti hringir.) verið á þessu, um einhvers konar heildaraðkomu að þessu. Það hefur vissulega verið rætt en ekki í þessu samhengi sem hv. þingmaður setur það hér fram í.