hagkvæmnisathugun á uppbyggingu Skógarstrandarvegar.
Forseti. Ég vil þakka hv. þm. Bjarna Jónssyni fyrir framsöguna um þetta mál. Hv. þingmaður er jafnframt formaður umhverfis- og samgöngunefndar og í því ljósi velti ég fyrir mér stöðu stofnvega í vegakerfinu og forganginn sem ætti að vera á uppbyggingu þeirra umfram aðra vegi, hvernig hv. þingmaður sér þá í forgangsröðinni í samgönguáætlun. Þá vil ég spyrja hv. þingmann hvenær ætla megi að umfjöllun um samgönguáætlun verði lokið. Auðvitað velta allar framkvæmdir í samgöngum á því að það sé til staðar samgönguáætlun til að vinna eftir. Þess vegna leikur mér forvitni á að vita hvernig vinnunni miðar í umhverfis- og samgöngunefnd. Loks langar mig að spyrja hv. þingmann hvað felist í hagkvæmniathugun umfram það sem er í rauninni lagt til grundvallar við gerð samgönguáætlunar hverju sinni.