Störf þingsins.

Virðulegi forseti. Viðskiptablaðið vekur athygli á því að útgjöld ríkissjóðs halda áfram að aukast, og það verulega. Það lítur út fyrir að við verðum með heilan áratug af halla á ríkissjóði og það er í boði ríkisstjórnar undir forystu Sjálfstæðisflokksins. Við erum með nýja könnun sem sýnir að 70% heimila landsins, þar er ungt fólk undir og millitekjuhóparnir, segja að verðbólga og vextir hafi mikil áhrif á heimilisbókhaldið. En forysta ríkisstjórnarinnar segir: Sjáið þið ekki veisluna? 70% heimila segja þetta hafa mikil áhrif. Það er í samræmi við það sem við í Viðreisn höfum fundið mjög sterkt fyrir, að heimilin og fyrirtækin í landinu róa mjög þungan róður þessa dagana. Við skynjum þetta ákall til okkar stjórnmálamanna að standa undir þeirri ábyrgð að koma böndum á verðbólguna svo að hægt sé að lækka vextina. Það er mesta kjarabótin fyrir heimili landsins. Nýjustu spár benda hins vegar til þess að við náum því ekki fyrr en í fyrsta lagi árið 2026 og það er algerlega óásættanleg staða og ákveðin uppgjöf, að mínu mati, af hálfu ríkisstjórnarinnar.

En hvað þýða stanslaus útgjöld? Ég held að fólk hér á Íslandi myndi sætta sig við það ef það fyndi að við værum að fá betri heilbrigðisþjónustu. Nei, við erum enn með biðlista eftir heilsugæslulæknum, eftir því að fólk með fíknisjúkdóma komist í meðferð, eftir geðheilbrigðisþjónustu, eftir hjúkrunarheimilum. Fólk myndi líka sætta sig við aukin útgjöld ef það fyndi t.d. að það væru fleiri lögreglumenn hér á landinu eða betri samgöngur. En það er ekki svo. Þessi ríkisstjórn er að senda framtíðarkynslóðum reikninginn. Hún er að setja það í hendur næstu ríkisstjórnar að leysa verkefnin. Það er það sem við þurfum, við þurfum starfhæfa ríkisstjórn sem er með meiri raunveruleikatengingu en sú sem nú er starfandi.