Alþjóðleg efnahagsmál og sjálfbærni ríkisfjármála rædd á fundi starfsfólks fjárlaganefnda og fjármálaráða OECD
Tveggja daga fundi starfsfólks fjárlaganefnda og fjármálaráða innan OECD (Efnahags- og framfarastofnunarinnar) lauk föstudaginn 14. apríl í Hörpu í Reykjavík. Fjallað var m.a. um alþjóðleg efnahagsmál, sjálfbærni ríkisfjármála, þróun í heilbrigðisútgjöldum og velferðartækni framtíðar, loftslagsbreytingar og opinber fjármál, mikilvægi fjölbreytileika á vinnumarkaði og fyrirmyndarumgjörð um alla þætti fjárlagagerðar þjóðþinga innan OECD.
Birgir Ármannsson, forseti Alþingis, bauð fundargesti velkomna og Ragna Árnadóttir skrifstofustjóri, Anna Sigurborg Ólafsdóttir framtíðarfræðingur og Eyþór Benediktsson hagfræðingur héldu erindi fyrir hönd Alþingis.
Hópur starfsfólks fjárlaganefnda og fjármálaráða innan OECD að lokinni móttöku hjá forseta Íslands, Guðna Th. Jóhannessyni, á Bessastöðum.
Ragna Árnadóttir, skrifstofustjóri Alþingis, flutti erindi um mikilvægi fjölbreytileika á vinnumarkaði.
Anna Sigurborg Ólafsdóttir, framtíðarfræðingur á nefnda- og greiningarsviði, önnur frá vinstri á borði Íslands, flutti erindi, það gerði einnig Eyþór Benediktsson, hagfræðingur á nefnda- og greiningarsviði, henni á hægri hönd. Næstir henni í röðinni eru ritarar fjárlaganefndar Alþingis, viðskiptafræðingarnir Ólafur Elfar Sigurðsson og Jón Magnússon, sá síðarnefndi einnig deildarstjóri fjárlaga- og greiningardeildar.
