Breyting á ýmsum lögum vegna fjárlaga 2024
2. mál á 154. löggjafarþingi.
Fjármála- og efnahagsráðherra.
Markmið
Að breyta ýmsum lögum sem tengjast tekju- eða gjaldahlið ríkissjóðs í samræmi við forsendur fjárlagafrumvarps fyrir árið 2024.Helstu breytingar og nýjungar
Lagt er til að krónutöluskattar (kolefnisgjald, olíugjald, almennt og sérstakt kílómetragjald, almennt og sérstakt bensíngjald, bifreiðagjald og gjald á áfengi og tóbak) hækki um 3,5%. Sama gildir um gjald í Framkvæmdasjóð aldraðra og sérstakt gjald til Ríkisútvarpsins. Gert er ráð fyrir hækkun á lágmarksfjárhæð bifreiðagjalds sem lagt er á fólksbíla. Þá er lagt til að gerðar verði breytingar á eftirlitsgjaldi til að standa undir áætluðum kostnaði við rekstur Fjármálaeftirlits og skilavalds innan Seðlabanka Íslands. Gert er ráð fyrir lækkun gjaldhlutfalls vegna greiðslu kostnaðar við rekstur umboðsmanns skuldara í samræmi við áætlaðan rekstrarkostnað stofnunarinnar. Lagt er til bráðabirgðaákvæði sem koma skal í veg fyrir að kostnaðarþátttaka heimilismanna á dvalar- og hjúkrunarheimilum aukist við það að tengingar við tekjur maka voru afnumdar. Lagt er til að sóknargjöld verði lækkuð og að breytingar verði gerðar á fjárhæð losunargjalds samkvæmt lögum um loftslagsmál. Þá er stefnt að hækkun úrvinnslugjalds á hjólbarða og gerðar verða breytingar á verðmætagjaldi sjókvíaeldis. Gert er ráð fyrir að tekjuskattur lögaðila hækki tímabundið til eins árs um eitt prósentustig. Flestar aðrar breytingar tengjast framlengingu bráðabirgðaákvæða.Breytingar á lögum og tengd mál
Alls er verið að breyta 21 lögum.Kostnaður og tekjur
Gjöld
Tillaga í frumvarpinu um óbreyttar viðmiðanir vaxtabótakerfisins leiðir til þess að útgjöld vegna vaxtabóta nema 2,8 milljörðum króna á árinu 2024. Gert er ráð fyrir að hlutur ofanflóðasjóðs í kostnaði við vinnu við gerð hættumats verði allt að 140 milljónir kr.
Tekjur
Verðlagsuppfærsla krónutölugjalda mun auka tekjur ríkissjóðs um 3,1 milljarða kr. Hækkun útvarpsgjalds og gjalds í Framkvæmdasjóð aldraðra nemur samtals um 320 milljónum kr. Áætlað er að hækkun lágmarksfjárhæðar bifreiðagjalds skili ríkissjóði 1,3 milljörðum kr. í viðbótartekjur.
Áætlað er að breytingar á verðmætagjaldi vegna sjókvíaeldis skili ríkissjóði um 630 milljónum kr. Tekjuáhrif á ríkissjóð nema samtals um 5.378 milljónum kr.
